گورنر کے ہاتھوں ویشالی ضلع کے سپوت، بین الاقوامی مادری زبان اور ثقافت کے علمبردار ڈاکٹر ششی بھوشن کمار اعزاز سے سرفراز

محمد آصف عطا

حاجی پور‌/ پٹنہ 

 لوک بھون میں عالمی ہندی کونسل کی جانب سے منعقدہ ایک خصوصی پروگرام میں بہار کے معزز گورنر لیفٹیننٹ جنرل (ریٹائرڈ) ٹی۔ سری سائیّد عطا حسنین اور راشٹریہ سویم سیوک سنگھ کے سینئر پرچارک جناب اندریش کمار کے ہاتھوں ویشالی ضلع کے معروف صحافی اور مادری زبان و ثقافت کے علمبردار ڈاکٹر ششی بھوشن کمار کو اعزاز سے نوازا گیا۔ واضح رہے کہ ڈاکٹر ششی بھوشن کمار گزشتہ تقریباً 15 برسوں سے ہندی، مادری زبان اور بہار کی ثقافت کو سارک ممالک تک پہنچانے کے لیے ایک منفرد بین الاقوامی مہم چلا رہے ہیں۔ ان کا ماننا ہے کہ اپنی مادری زبان اور ثقافت کو دنیا کے تمام جمہوری ممالک تک پہنچانا وقت کی اہم ضرورت ہے اور یہی ان کی بین الاقوامی مہم کا مقصد ہے۔ اس سے قبل بھی ڈاکٹر ششی بھوشن کمار نے متعدد بین الاقوامی اور علاقائی پروگراموں کے ذریعے زبان و ثقافت کے فروغ کے لیے ایک طویل سلسلہ شروع کیا ہے، تاکہ ملک اور دنیا کے لوگ ہندوستان کی مختلف زبانوں اور ثقافتی ورثے سے واقف ہو سکیں۔ ڈاکٹر کمار کا کہنا ہے کہ ہندی ہماری قومی شناخت، اتحاد اور سالمیت کی علامت ہے، جبکہ مادری زبان ہماری حساسیت، اندرونی جذبات اور دل کی کیفیت کو دوسروں تک پہنچانے کا ذریعہ ہے۔ مادری زبان عوام کے جذبات سے براہِ راست جڑی ہوئی ہوتی ہے۔ ڈاکٹر ششی بھوشن کمار کو اس سے قبل نیپال کی جانب سے "دھرما دتیہ دھرماچاریہ بین الاقوامی مادری زبان صحافت اعزاز 2025" سے بھی نوازا جا چکا ہے۔ یہ اعزاز نیپال میں مادری زبان کی صحافت کے بانی دھرما دتیہ دھرماچاریہ جی کے نام سے سارک ممالک میں مادری زبان کے فروغ کے لیے غیر معمولی خدمات انجام دینے پر دیا جاتا ہے۔ ہندوستان میں یہ اعزاز ڈاکٹر ششی بھوشن کمار کو حاصل ہوا۔ اس کے علاوہ South Asia Hero Award 2026 بھی انہیں سری لنکا کی معروف تنظیم South Asia Collaboration Foundation کی جانب سے جنوبی ایشیا کے ممالک، جن میں ہندوستان، نیپال، بنگلہ دیش، بھوٹان اور سری لنکا شامل ہیں، میں صحافتی قیادت اور خدمات کے اعتراف میں دیا گیا ہے۔‌ڈاکٹر ششی بھوشن کمار کو مسلسل زبان، صحافت اور ثقافت کے شعبے میں بین الاقوامی سطح پر کام کرنے اور ہندوستان خصوصاً بہار کی ثقافتی شناخت کو دنیا کے سامنے پیش کرنے کے لیے مختلف قومی و بین الاقوامی اعزازات سے نوازا جاتا رہا ہے۔ ان کی اس کامیابی پر ویشالی ضلع کے لوگوں اور صحافتی و سماجی حلقوں میں خوشی کا اظہار کیا جا رہا ہے۔

ساتھ میں تصویر۔