تعلیم کا عظیم عطیہ دینے والا ہر شخص ’’گرو‘‘ ہے: جسٹس مان دھاتا سنگھ

ویشالی بین الاقوامی ودیا پیٹھ کے زیرِ اہتمام سِمَج، پٹنہ کے احاطے میں ’’گرو سمان تقریب‘‘ کا انعقاد

محمد آصف عطا

حاجی پور‌/ پٹنہ

تعریفیں اور مفہوم اگرچہ وقت کے ساتھ بدل گئے ہیں، لیکن تعلیم کا عظیم عطیہ دینے والا ہر باصلاحیت شخص ’’گرو‘‘ ہی ہے۔ اساتذہ ہی معاشرے کے معمار ہوتے ہیں اور ان کا احترام دراصل خدا کے احترام کے مترادف ہے۔ یہ بات پٹنہ ہائی کورٹ کے سابق جج جسٹس مان دھاتا سنگھ نے انسانی حقوق ٹوڈے اور ویشالی بین الاقوامی ودیا پیٹھ کے زیرِ اہتمام سِمَج، پٹنہ کے احاطے میں منعقدہ ’’گرو سمان تقریب 2026‘‘ کا افتتاح کرتے ہوئے کہی۔ انہوں نے کہا کہ ہماری علمی روایت میں کسی کے بھی حق کی پامالی اور اسے تکلیف پہنچانا گناہ تصور کیا گیا ہے۔ پرانوں کا نچوڑ ہے: ’’پروپکارائے پنیائے، پاپائے پرپیڑنم‘‘، یعنی دوسروں کی بھلائی کرنا نیکی ہے اور دوسروں کو تکلیف دینا گناہ ہے۔ یہی علم اور انسانی حقوق کے تحفظ کا بنیادی اصول ہے۔ تقریب کے مہمانِ خصوصی اور معروف ماہرِ ریاضیات پروفیسر کے۔ سی۔ سنہا نے کہا کہ ہندوستان اس لیے ’’وشو گرو‘‘ تھا، کیونکہ یہاں تعلیم دینے کی صلاحیت موجود تھی۔ یہاں نالندہ اور وکرم شِلا جیسے عظیم الشان جامعات قائم تھے، جہاں دنیا بھر سے طلبہ علم حاصل کرنے کے لیے آتے تھے۔ انہوں نے کہا کہ ایک استاد معاشرے کی تعمیر بھی کر سکتا ہے اور اس کی تباہی کا سبب بھی بن سکتا ہے، اسی لیے اساتذہ کی اہمیت ہمیشہ برقرار رہی ہے۔bتقریب کی صدارت کرتے ہوئے بہار ہندی ساہتیہ سمیلن کے صدر ڈاکٹر انیل سلبھ نے کہا کہ جب معاشرے میں زوال کے آثار نظر آنے لگیں تو سمجھنا چاہیے کہ ہمارے تعلیمی نظام میں کہیں نہ کہیں خرابی پیدا ہو گئی ہے۔ ہم صرف دوسروں کو نصیحت کرنے والے بن گئے ہیں، لیکن ہمارے اپنے کردار اور طرزِ عمل پاکیزہ نہیں رہے۔ آج طلبہ میں اساتذہ کے تئیں بے اعتنائی بلاوجہ نہیں ہے۔ ہمیں اس سلسلے میں محتاط اور بیدار ہونے کی ضرورت ہے۔ اگر ہم ہندوستان کو دوبارہ ’’وشو گرو‘‘ کے مقام پر دیکھنا چاہتے ہیں تو ہمیں اپنے رشیوں اور آچاریوں کی طرح علم، ریاضت اور اچھے کردار کو اپنی زندگی کا حصہ بنانا ہوگا۔ اس موقع پر پدم شری جتیندر کمار سنگھ، پدم شری ومل جین، پدم شری اشوک وشواس، سِمَج کے ڈائریکٹر نیرج اگروال، ڈاکٹر تارکیشور پنڈت، ڈاکٹر جنگ بہادر پانڈے، ڈاکٹر سمیڈھا پاٹھک، ڈاکٹر رینو کماری، ڈاکٹر کمل کشور بدھ، ڈاکٹر مدھو پربھا سنگھ اور امیت کمار وشواس نے بھی اپنے خیالات کا اظہار کیا۔ مہمانوں کا استقبال وشالی بین الاقوامی ودیا پیٹھ کے بانی اور بین الاقوامی شہرت یافتہ انسانی حقوق صحافت کے علمبردار ڈاکٹر ششی بھوشن کمار نے کیا۔ شکریہ کی رسم الکا شری نے ادا کی، جبکہ اسٹیج کی نظامت پرویز کوثر نے کی۔ اس موقع پر معروف مصنف ڈاکٹر چندرجیت ورما کی تصنیف ’’پوروانچل کی ماٹی‘‘ کی بھی رسمِ رونمائی کی گئی۔ تقریب کے دوران بہار اور جھارکھنڈ کے 101 اساتذہ و معلمات کو ان کی تعلیمی خدمات کے اعتراف میں ’’گرو سمان 2026‘‘ سے نوازا گیا۔ وہیں وِیشالی ضلع کے مشہور صحافی محمد شاہ نواز عطا کو بھی اعزاز سے نوازا گیا۔ 

ساتھ میں تصویر ۔