ہر گھر ترنگا‘ مہم کے تحت اسکولوں میں ترنگا یاترا، پربھات پھیری، مصوری اور ثقافتی پروگرام منعقد

محمد آصف عطا

حاجی پور

ضلع مجسٹریٹ، ویشالی محترمہ ورشا سنگھ کی رہنمائی میں ضلع میں ’ہر گھر ترنگا مہم‘ کے تحت حب الوطنی اور عوامی شمولیت کو فروغ دینے کے مقصد سے مختلف اسکولوں میں متعدد پروگرام منعقد کیے گئے۔ ان پروگراموں میں طلبہ و طالبات، اساتذہ اور مقامی شہریوں نے جوش و خروش کے ساتھ حصہ لیا۔ ضلع مجسٹریٹ نے ضلع کے تمام اسکولوں اور متعلقہ افسران کو ہدایت دی ہے کہ ’ہر گھر ترنگا مہم‘ کو زیادہ سے زیادہ عوامی شمولیت کے ساتھ کامیاب بنایا جائے۔ انہوں نے کہا کہ بچوں اور نوجوانوں کے ذریعے قومی اتحاد، سالمیت اور قومی پرچم کے احترام کا پیغام معاشرے کے ہر طبقے تک پہنچایا جائے۔ مہم کے تحت مختلف اسکولوں میں طلبہ و طالبات کی جانب سے ترنگا یاترا اور پربھات پھیری نکالی گئی۔ ہاتھوں میں قومی پرچم تھامے طلبہ نے حب الوطنی کے نعروں اور قومی گیتوں کے ساتھ اسکول احاطے اور آس پاس کے علاقوں کا دورہ کیا۔ اس دوران عام لوگوں کو بھی یومِ آزادی کے موقع پر اپنے گھروں پر ترنگا لہرانے کے لیے ترغیب دی گئی۔اسکولوں میں مصوری اور پینٹنگ مقابلوں کا بھی انعقاد کیا گیا۔ طلبہ نے ترنگا، حب الوطنی، تحریکِ آزادی، ’’تنوع میں اتحاد‘‘ اور ’ہر گھر ترنگا‘ مہم کے جذبے کو اپنی تخلیقات کے ذریعے پیش کیا۔ بہترین کارکردگی کا مظاہرہ کرنے والے طلبہ کی اسکول کی سطح پر حوصلہ افزائی کی گئی۔اسی سلسلے میں حب الوطنی کے گیت، گروپ گان، رقص، تقریری مقابلے، نظم خوانی اور ڈرامے سمیت مختلف ثقافتی پروگرام بھی منعقد کیے گئے۔ طلبہ نے مجاہدینِ آزادی کی قربانیوں، ملک کے اتحاد و سالمیت اور شہری فرائض سے متعلق پیغامات پیش کیے۔ ان پروگراموں کے ذریعے اسکولوں میں حب الوطنی اور قومی فخر کا ماحول پیدا ہوا۔ ضلع مجسٹریٹ محترمہ ورشا سنگھ نے کہا کہ قومی پرچم صرف ملک کی آزادی اور خودمختاری کی علامت نہیں ہے، بلکہ یہ کروڑوں ہندوستانیوں کے جذبات، قربانیوں، ایثار اور قومی وقار سے جڑا ہوا ہے۔ انہوں نے کہا کہ اس مہم کے ذریعے طلبہ اور نوجوانوں میں حب الوطنی، نظم و ضبط، سماجی ذمہ داری اور ذمہ دار شہری ہونے کے جذبے کو مزید مضبوط کیا جائے۔ واضح رہے کہ آئندہ 17 اگست تک ضلع میں ’ہر گھر ترنگا مہم‘ کے تحت مختلف بیداری اور عوامی شمولیت پر مبنی پروگرام منعقد کیے جائیں گے۔ اس دوران ضلع کے جنداہا بلاک علاقہ واقع ریاستی پرایمری اردو اسکول چک دیوان میں بھی بچوں کے ذریعے ترنگا جھنڈا لیکر گھر گھر ترنگا لہرانے کا پیغام دیا گیا۔ اس موقع پر ایچ ٹی محترمہ رود رانی بھارتی، استاد محمد شاہ نواز عطا، محمد امتیاز احمد، رسویا ریحانہ خاتون وغیرہ موجود تھیں۔ جبکہ ضلع کے مختلف بلاک علاقہ کے اسکولوں میں بھی ہر گھر ترنگا مہم چلائی گئی۔ 

ساتھ میں تصویر ۔